Neha Rohatgi ver doktorsritgerð sína í líf- og læknavísindum sem ber heitið: Kerfislíffræði efnaskipta í manninum – kortlagning á bandvefslíkri umbreytingu og virkni glúkonókínasa. Systems Biology of Human Metabolism - Defining the epithelial to mesenchymal transition and the activity of human gluconokinase.
Andmælendur eru dr. Markus Herrgard, prófessor við Danmarks Tekniske Universitet, og dr. Albert Vernon Smith, erfðafræðingur hjá Hjartavernd.
Leiðbeinendur eru dr. Óttar Rolfsson, lektor við Læknadeild Háskóla Íslands, og dr. Steinn Guðmundsson, dósent við Iðnaðarverkfræði-, vélaverkfræði- og tölvunarfræðideild Háskóla Íslands. Auk þeirra sátu í doktorsnefnd dr. Ólafur Eysteinn Sigurjónsson, dósent við Háskólann í Reykjavík, dr. Ólafur Þ. Magnússon, sérfræðingur hjá Íslenskri erfðagreiningu, og dr. Ines Thiele, dósent við University of Luxembourg.
Magnús Karl Magnússon, prófessor og deildarforseti Læknadeildar Háskóla Íslands, stjórnar athöfninni.
Ágrip af rannsókn
Verkefnið, sem skiptist í þrjá hluta, miðaði að því að auka þekkingu á efnaskiptaferlum í manninum með aðferðum lífefnafræði og kerfislíffræði. Unnið var að auðkenningu á breytingum í efnaskiptum, sem eiga sér stað samfara bandvefsumbreytingum í brjóstaþekjuvef. Bandvefsumbreyting er líffræðilegt ferli sem er talið taka þátt í myndun meinvarpa. Smíðuð voru reiknilíkön af efnaskiptum út frá tjáningu erfðaþátta og lífefnamælingum í frumulínunum D492 og D492M. Með líkönunum fengust upplýsingar um einstök efnahvörf sem talin eru gegna lykilhlutverki í bandvefsumbreytingu í D492. Aðferðafræðin sem þróuð var í verkefninu getur enn fremur nýst við rannsóknir á fleiri frumulínum auk auðkenningar lífmarka.
Í öðrum hluta verkefnisins voru áhrif glúkónókínasa-ensímsins á efnaskipti mannsins skoðuð með reiknilíkani. Efnahvörfum sem eru sértæk fyrir nýmyndun og niðurbrot glúkónats var bætt við reiknilíkan af efnaskiptum í rauðfrumum. Niðurstöðurnar sýndu að næringar- og lyfjastoðefnið glúkónat hefur líklegast víðtæk áhrif á efnaskiptaferla í manninum.
Í þriðja hluta verkefnisins var hvötunarvirkni glúkónókínasa ákvörðuð með lífefnafræði- og varmafræðitilraunum. Niðurstöðurnar sýndu að hægt er að nota varmafræðimælingar til að ákvarða hvötunargetu ensíma.
Verkefnið sýnir hvernig samtvinna má hefðbundnar greiningaraðferðir úr lífefnafræði við kerfislíffræði til að afla nýrrar þekkingar á efnaskiptaferlum í manninum.
Um doktorsefnið
Neha Rohatgi, sem er fædd árið 1989 í Nýju Delí á Indlandi, lauk BSc-gráðu í lífvísindum árið 2009 frá Banasthali University í Rajasthan á Indlandi og MSc-gráðu í sömu grein frá VIT University í Tamil Nadu á Indlandi tveimur árum síðar. Neha hóf doktorsnám við Læknadeild undir handleiðslu Óttars Rolfssonar árið 2012. Foreldrar hennar eru Rashim Rohatgi, athafnamaður, og Neelam Rohatgi, húsmóðir.