Ráðstefna Norræna fyrirbærafræðifélagsins (Nordic Society for Phenomenology – NoSP) fer fram í Háskóla Íslands dagana 21.-23. apríl. Ráðstefnan er öllum opin og aðgangur er ókeypis. Ráðstefnan fer fram á ensku.
Norræna fyrirbærafræðifélagið er eitt stærsta félag heimspekinga á Norðurlöndum. Félagið var stofnað árið 2001 og hefur haldið ráðstefnur árlega frá árinu 2003. Ráðstefnan í Reykjavík 2016 verður sú þrettánda í röðinni og er þetta í þriðja skipti sem ráðstefna félagsins fer fram við Háskóla Íslands.
Yfirskrift ráðstefnunnar er „Phenomenology and Beyond“.
Á dagskránni eru sjö aðalerindi og 78 styttri erindi í málstofum.
Ráðstefnan hefst kl. 13:00 fimmtudaginn 21. apríl í stofu 101 í Odda. Opnunarfyrirlesturinn heldur Shaun Gallagher, prófessor við University of Memphis, sem er einn þekktasti sérfræðingur heims á sviði fyrirbærafræði og hugfræða (e. cognitive sciences). Meðal bóka hans má nefna How the body shapes the mind (2005) og The phenomenological mind (2008; meðhöfundur Dan Zahavi). Sjá nánar á http://www.memphis.edu/philosophy/people/bios/shaun-gallagher.php.
Meðal annarra aðalfyrirlesara eru Marcia Sá Cavalcante Schuback, prófessor við Södertörns högskola í Stokkhólmi, og Vilhjálmur Árnason, prófessor við Háskóla Íslands.
Eins og nærri má geta verður æði margt til umfjöllunar á ráðstefnunni, en meðal þess má nefna fáfræði, barnæsku, geðræna kvilla, táknfræði, líkamleika, sköpun, skynjun, hugtakamyndun, flóttafólk, skuldir, dýr og menn, þunglyndi, öndun, gagnsleysi, veru-til-dauðans, samfélög, stríð, Evrópu, sjálfsraskanir, samkennd, dulhyggju, líkamstjáningu, túlkunarfræði, heimilisleysi, vistspeki, tilfinningar, atvinnuviðtöl, afstæðiskenninguna, gaumstol og Múmínálfana.
Ráðstefnan er öllum opin og aðgangur er ókeypis. Ráðstefnan fer fram á ensku.
Um fyrirbærafræði má fræðast á Vísindavefnum: http://visindavefur.hi.is/svar.php?id=7104
Ráðstefnan er haldin á vegum Heimspekistofnunar Háskóla Íslands í samvinnu við Félag áhugamanna um heimspeki og Hugvísindastofnun Háskóla Íslands.