Á sumardaginn fyrsta, þann 21. apríl næstkomandi, verður haldið málþing í minningu dr. Brodda Jóhannessonar, skólastjóra Kennaraskóla Íslands og fyrsta rektors Kennaraháskóla Íslands. Þann dag eru liðin 100 ár frá fæðingu hans. Dr. Broddi setti mark á samtíð sína og hafði djúptæk áhrif á nemendur sína og samstarfsmenn.
Æviferill Brodda var helgaður menntun og menningu. Hann kenndi víða, lengst við Kennaraskóla Íslands og varð skólastjóri KÍ 1962–1971 og eftir það fyrsti rektor Kennaraháskólans 1971-75. Eftir Brodda liggja nokkrar bækur, frumsamdar og þýddar, auk fjölda greina og fyrirlestra. Hann var um árabil ritstjóri Menntamála, tímarits um uppeldis- og menntamál, sem gefið var út um árabil af SÍB (Sambandi íslenskra barnakennara).
Broddi setti sitt mark á þróun kennaramenntunar á Íslandi með hugsjónum sínum og dug. Hann var mikill náttúrunnandi og náttúruverndarsinni löngu áður en talað var um menn sem slíka. Rödd Brodda hljómaði oft í útvarpi, en hann var löngum eftirsóttur þáttastjórnandi, viðmælandi og upplesari.
Málþingið fer fram umræddan dag, kl. 14-16, í Skriðu í húsnæði Menntavísindasviðs Háskóla Íslands (gamla KHÍ) við Stakkahlíð.
Að málþinginu standa nokkrir nemendur og samstarfsmenn dr. Brodda í samvinnu við Menntavísindasvið Háskóla Íslands.