Námsbraut um kennslu í framhaldsskólum og Rannsóknarstofa um þróun skólastarfs við Háskóla Íslands boða til opinna funda um rannsóknir á framhaldsskólastarfi. Málstofurnar verða haldnar í húsnæði Menntavísindasviðs Háskóla Íslands við Stakkahlíð. Erindin eru að jafnaði um 20 mínútur og jafnlangur tími er ætlaður til umræðna. Erindin eru flutt á íslensku nema annað sé tekið fram.
Kristján Jóhann Jónsson, dósent við Menntavísindasvið Háskóla Íslands flytur fyrirlestur undir yfirskriftinni: Bókmenntakennsla og sköpun merkingar.
Fjallað verður um upplýsingar um bókmenntakennslu í framhaldsskólum úr gögnum rannsóknarinnar Íslenska sem námsgrein og kennslutunga (2012–2015), bæði viðtölum og vettvangslýsingum. Leitað verður eftir því hvernig bókmenntakennslu er lýst í rannsókninni og almennt gildi bókmenntakennslu íhugað. Dæmi verða tekin af ýmiss konar bókmenntum og orðræðu þeirra um mikilvæg málefni eins og til dæmis gildi skólagöngu, tengsl kynslóðanna og líf og dauða.
Málstofan er haldin í samvinnu við Rannsóknarstofu í íslenskum fræðum og íslenskukennslu.
Allir velkomnir meðan húsrúm leyfir.