Mánudaginn 9. september flytur dr. Jaakko Rusama opinberan fyrirlestur í boði Guðfræðistofnunar í stofu 229 í Aðalbyggingu HÍ. Fyrirlesturinn hefst kl. 11:40.
Yfirskrift fyrirlestursins er: Eining og aðgreining. Enska biskupakirkjan og Evangelísk lútherska kirkjan í samkirkjulegu hreyfingunni.
Evangelísk lúthersk kirkja og Enska biskupakirkjan tilheyra hinni alþjóðlegu samkirkjulegu hreyfingu. Báðar kirkjudeildir leggja áherslu á að túlka eininguna sem kristin kirkja byggir á. Þess vegna hafa þær leitast við að finna leiðir til að tjá hinn sameiginlega boðskap í ólíku samhengi. Samt sem áður eru þessar kirkjudeildir ekki að fullu sammála í kenningarlegum efnum og innan þeirra sjálfra ríkir að sama skapi ekki fullkomin eining. Samkirkjulega hreyfingin gengur nú í gegnum miklar breytingar. Í fyrirlestrinum verður leitast við að svara því hvernig kirkjudeildirnar bregðast við þeim áskorunum sem þær standa frammi fyrir á þessum breytingatímum.
Dr. Jaakoo Rusama er aðjúnkt í samkirkjulegri guðfræði við háskólann í Helsinki í Finnlandi og prestur í hinni Evangelísk Lúthersku kirkju í Finnlandi. Hann lauk doktorsgráðu frá háskólanum í Cambridge í Bretlandi 1985 og mastersgráðu frá háskólanum í Helsinki 1974. Eftir hann liggur mikið af rituðu efni, aðallega um samkirkjuleg málefni en einnig siðfræði og kennslu.
Fyrirlestur dr. Rusama er hluti af heimsókn fulltrúa the International Anglican-Lutheran Society til Íslands dagana 6. til 10. september. Nánari upplýsingar um félagið má finna hér: www.anglican-lutheran-society.org.