“Áhrif fæðingarstærðar og vaxtar í bernsku á áhættuþætti og dánartíðni vegna hjarta- og æðasjúkdóma” (Early growth and later health - Influence of birth size and childhood growth on cardiovascular disease risk factors and mortality).
Andmælendur eru dr. Janet Rich-Edwards, dósent í læknisfræði og faraldsfræði við Harvard háskólann í Bandaríkjunum og dr. Pétur Benedikt Júlíusson, barnalæknir og yfirlæknir við Háskólasjúkrahúsið í Bergen, Noregi. Leiðbeinendur voru dr. Ingibjörg Gunnarsdóttir, prófessor, HÍ og dr. Þórhallur Ingi Halldórsson, dósent, HÍ. Auk leiðbeinenda í doktorsnefnd voru dr. Inga Þórsdóttir prófessor og forseti Heilbrigðisvísindasviðs HÍ, dr. Vilmundur Guðnason prófessor við HÍ og forstöðumaður Hjartaverndar.
Franklín Georgsson varadeildarforseti Matvæla- næringarfræðideildar stjórnar athöfninni sem fer fram í Hátíðasal, Aðalbyggingu HÍ og hefst athöfnin klukkan 10.00.
Ágrip úr rannsókn
Rannsóknir hafa bent til þess að umhverfisáhrif á fósturskeiði og í barnæsku geti aukið líkur á hjarta- og æðasjúkdómum síðar á lífsleiðinni og einnig hefur hraður vöxtur á ungbarnaskeiði verið tengdur ofþyngd og offitu í barnæsku.
Markmið rannsóknarinnar var að meta umhverfisþætti sem hafa áhrif á vöxt á fósturskeiði og áhrif vaxtar í barnæsku á áhættuþætti hjarta- og æðasjúkdóma og dánartíðni hjá einstaklingum sem tóku þátt í Reykjavíkurrannsókn Hjartaverndar. Að auki voru skoðuð tengsl næringar á fyrstu mánuðum eftir fæðingu við vöxt á ungbarnaskeiði og líkamsþyngdarstuðul (LÞS) í barnæsku í framsýnni hóprannsókn á börnum.
Gögn Reykjavíkurrannsóknar Hjartaverndar sýndu að einstaklingar fæddir í kreppunni miklu (1930-1934) voru léttari við fæðingu og voru líklegri til að vera of feitir á fullorðins aldri, en offita er áhættuþáttur hjarta- og æðasjúkdóma. Þegar vöxtur barna var skoðaður sást að tengsl voru milli aukningar í LÞS frá 8 ára til 13 ára og dánartíðni af völdum hjarta- og æðasjúkdóma með karla. Meðal kvenna sást að bæði aukning í LÞS og hámarks hæðarbreyting fyrir 12 ára aldur voru tengd aukinni áhættu á hjarta- og æðasjúkdómum. Þar sem næring á fyrstu ævimánuðum var skoðuð sáum við að börn sem fá fasta fæðu við 5 mánaða aldur vaxa hraðar á ungbarnaskeiði og hafa hærri LÞS við 6 ára aldur en þau sem eru eingöngu á brjósti.
Þegar kemur að forvörnum gegn hjarta- og æðasjúkdómum hefur mikil áhersla verið lögð á aðgerðir á fullorðinsaldri. Niðurstöður okkar benda til þess að umhverfisáhrif snemma á lífsleiðinni geti haft langvarandi áhrif og aukið líkur á hjarta- og æðasjúkdómum. Mikilvægt er að leggja áherslu á fæðuvenjur og lífsstíl sem tryggja hæfilegar þyngdarbreytingar og vöxt strax á meðgöngu og á barnsaldri.
Um doktorsefnið
Cindy er fædd árið 1985. Hún lauk BS prófi í næringarfræði frá University of California, Berkeley árið 2006, MS prófi í næringarfræði frá Friedman School of Nutrition Science and Policy, Tufts University, Boston árið 2008, og hóf doktorsnám í næringarfræði við Háskóla Íslands haustið 2010. Samhliða doktorsnáminu var Cindy stundakennari við HÍ og kom að öðrum verkefnum hjá Rannsóknastofu í næringarfræði.