Með fróðleik í fararnesti - Pöddulíf í Elliðaárdal

Háskóli Íslands og Ferðafélag barnanna bjóða upp á gönguferð í Elliðaárdal þar sem skordýralíf dalsins verður skoðað. Gangan verður þriðjudaginn 13. júní kl. 17 en mæting við gömlu rafstöðina við Elliðaár.

 

Þetta er ein vinsælasta ferðin okkar á ári hverju enda er hér skoðað allt það skríðandi og fljúgandi sem leynist í laufinu? Skordýr eru fjölbreyttasti flokkur dýra og á Íslandi hefur skordýrum fjölgað undanfarin ár af ýmsum ástæðum. Gísli Már Gíslason, prófessor í vatnalíffræði og skordýrasérfræðingur við Háskóla Íslands, fræðir okkur um heim skordýranna. Ílát og stækkunargler gera ferðina að algjöru ævintýri. Ferðin tekur um tvær klukkustundir.

 

Skordýraskoðunin er hluti af Háskóla unga fólksins en líka partur af verkefni Háskóla Íslands og Ferðafélags Íslands, Með fróðleik í fararnesti, sem hófst á aldarafmæli skólans árið 2011. Reynsla og þekking fararstjóra Ferðafélagsins og þekking kennara og vísindamanna Háskólans blandast saman í þessum áhugaverðu gönguferðum. Markmiðið með þeim er að vekja áhuga almennings á fræðslu og hollri útivist og fjölga valkostum í þeim efnum. Um leið er vakin athygli og vonandi áhugi á fjölbreyttri starfsemi Háskóla Íslands og Ferðafélagsins.