Fá handrit gefa gleggri innsýn í sjálfsmynd, hlutverk og heimsmynd manna en syrpur, handrit með fjölþættu efni. Elstu varðveittu syrpurnar úr eigu kvenna eru frá 17. öld. Margar voru þær skrifaðar fyrir ungar konur skömmu áður en þær gengu í hjónaband eða stuttu eftir. Í erindinu verður fjallað um syrpu sem skrifuð var fyrir eyfirska húsmóður á síðari hluta 18. aldar. Hvað leyndist í syrpunni hennar? Trauðla uppskrift að franskri súkkulaðiköku eða snið að nýjustu tísku frá París. Hvers þurfti fyrirmyndarhúsmóðir við á 18. öld til að reka menningarlegt heimili á þeirra tíma mælikvarða?
Guðrún Ingólfsdóttir er doktor í íslenskum bókmenntum og gaf nýverið út bókina Á hverju liggja ekki vorar göfugu kellíngar sem fjallar um bókmenningu íslenskra kvenna frá miðöldum fram á 18. öld.