Hvenær hefst þessi viðburður:
17. september 2016 - 14:00
Staðsetning viðburðar:
Nánari staðsetning:
Hátíðasalur
Í tilefni þess að 80 ár eru liðin frá því að franska rannsóknaskipið Pourquoi-Pas? fórst í aftakaveðri undan Mýrum í Borgarfirði verður efnt til málþings í Hátíðasal Háskóla Íslands um leiðangursstjórann Jean-Baptiste Charcot, heimskautarannsóknir hans og gildi þeirra. Málþingið fer fram laugardaginn 17. september kl. 14 og er opið öllum.
Föstudaginn 16. september verða liðin 80 ár þessu mannskæða sjóslysi en alls fórust 40 manns með Pourquoi-Pas?, þeirra á meðal læknirinn og leiðangursstjórinn Jean-Baptiste Charcot. Hann stjórnaði tveimur þverfaglegum vísindaleiðöngrum til Suðurheimsskautsins í upphafi síðustu aldar og á millistríðsárunum stjórnaði hann fjölmörgum slíkum leiðöngrum á norðurslóðir og er nú talinn meðal þeirra sem lögðu grunninn að heimskautarannsóknum nútímans. Einn skipverjanna, Eugène Gonidec, komst af með miklu harðfylgi og heppni og gat lýst síðustu stundunum í þessari örlagaríku för.
Charcot og menn hans komu margoft til Íslands og eignuðust hér marga vini. Slysið orkaði því afskaplega sterkt á Íslendinga eins og lesa má í blöðum frá þessum tíma og hefur lifað í vitund þjóðarinnar fram á þennan dag.
Franska sendiráðið, Háskóli Íslands og Vináttufélag Charcots og Pourquoi-Pas? standa að ýmsum viðburðum á þessum tímamótum í samstarfi við afkomendur Charcots sem hingað munu fjölmenna af þessu tilefni.
Meðal viðburða er áðurnefnt málþing í Hátíðasal Háskólans þann 17. september kl. 14. Erindi flytja Jean-Louis Étienne, heimsþekktur læknir, vísindamaður og heimskautakönnuður, Anne-Marie Vallin-Charcot, barnabarn Charcots leiðangursstjóra, Stéphane Dugast, blaðamaður og höfundur bókar um Charcot sem kemur út á næstunni, Friðrik Rafnsson, þýðandi og verkefnisstjóri, og Jörundur Svavarsson, prófessor í sjávarlíffræði og einn hvatamanna að stofnun Charcot-setursins í Sandgerði.
Aðgangur er ókeypis og allir velkomnir.