Fjórði fyrirlestur vormisseris í hádegisfyrirlestraröð RIKK verður 25. febrúar. Fyrirlesari að þessu sinni er Irene Dankelman, vistfræðingur og dósent við Radboud-háskóla í Nijmegen í Hollandi. Hún er jafnframt framkvæmdastjóri IRDANA, ráðgjafafyrirtækis í sjálfbærri þróun sem leggur sérstaka áherslu tengslin milli kyns og umhverfis. Hún er ráðgjafi Sameinuðu þjóðanna (UN Women, UNEP, FAO, UNESCO), ESB, opinberra stofnana og félagasamtaka um kyn og umhverfis-/loftlagsmál og hefur haldið fjölda fyrirlestra og birt bækur á þessu sviði. Árið 1988 gaf hún út sína fyrstu bók, Women and Environment in the Third World og 2010 birtist bók hennar Gender and Climate Change: an introduction.
Hún hefur að auki starfað sem sérfræðingur og ráðgjafi fyrir fjölda félagasamtaka, þar á meðal Oxfam-Novib, samtök sem berjast gegn fátækt í heiminum, Alþjóðanáttúruverndarsambandið (IUCN-Netherlands), WEDO (Women’s Environment and Development Organisation), WECF (Women in Europe for a Common Future), Stichting wAarde (foundation value earth) og Both ENDs (Environment and Development Services for NGOs). Hún hefur einnig tekið þátt í alþjóðlegri samningagerð um umhverfismál, loftslagsbreytingar og sjálfbæra þróun.
Í fyrirlestrinum mun Irene beina sjónum aftur til níunda áratugsins þegar skilningur á sambandi kyns og umhverfismála var að vakna. Þessi nýi skilningur varð undirrót margvíslegs feminísks aktívisma sem beindist að því að samþætta félagsleg málefni inn í stefnumörkun og framkvæmd umhverfismála og sjálfbærrar þróunar. Árangurinn er misjafn. Það er aðeins á síðastliðnum 15 árum sem samfélagsleg og menningarleg áhrif loftlagsbreytinga hafa verið viðurkennd og um leið mikilvægi þess að skoða sérstaklega afleiðingar þeirra fyrir líf kvenna og þess að þær séu fullir og virkir þátttakendur í baráttunni gegn þeim. Á þessum tíma hafa samtök sem samtvinna áherslu á konur/kyn og loftslagsbreytingar átt stóran hlut að máli þegar kemur að því að taka kynjavíddina inn í stefnumörkunarviðræður og aðgerðaráætlanir, nú síðast í desember á loftlagsráðstefnunni í París. Þó að niðurstaða hennar hafi verið léttir fyrir marga, er hún gagnrýniverð ef litið er til kynjasjónarmiða. Irene ræðir hlutverk ýmissra hagsmunaaðila og stofnana í innleiðingu kynjasjónarmiða í loftlagsaðgerðir og hlutverk og áskoranir akademíunnar í þessu tilliti.
Fyrirlesturinn er fluttur á ensku, er öllum opinn og aðgangur er ókeypis.
Viðburðurinn er á Facebook!
Hádegisfyrirlestraröðin á vormisseri 2016 er haldin í samvinnu við Þjóðminjasafn Íslands og UNU-GEST, Alþjóðlega jafnréttisskóla Háskóla sameinuðu þjóðanna.