Hjálmar H. Ragnarsson (1952) samdi Mörsug, tríó fyrir þrjár B-klarínettur, árið 1981 að beiðni Musica Nova og var verkið frumflutt það sama ár.
Jónas Tómasson (1946) segir um nýtt verk sitt sem frumflutt verður hér:
Í nóvember 2014 fluttu Hanna Dóra Sturludóttir og Chalumeaux- tríóið Via Crucis /Stabat Mater sem tengist föstudeginum langa og fékk ég þá hugmynd að semja verk sem tengdist jólunum. Ég valdi Maríuversið Alma Redemptoris Mater - sennilega eftir 11. aldar skáldið Hermann Contractus (Hermann kroppinbakur?). Ætli ég fari ekki að semja fleiri Maríusöngva - eitthvað sem tengist boðunardegi Maríu næst - hver veit?
Páll P. Pálsson (1928) samdi Trio trionfante fyrir Chalumeaux-tríóið 2002. Áður hafði hann samið verk fyrir tríóið og söngrödd við ljóð eftir G. Trakl.
Breska tónskáldið og klarínettuleikarinn, Sir Harrison Birthwistle (1934), umritaði 1975 fimm kóralforspil fyrir söngrödd og þrjú klarínettuhljóðfæri eftir Johann Sebastian Bach (1685-1750). Hér heyrum við fjögur þeirra.
Igor Stravinsky(1882-1975) samdi Vögguvísur kattarins árið 1915, þá búsettur í Sviss. Tónsmíðin byggist á þjóðlögum sem finna má í safni rússneska þjóðlagasafnarans, Pyotr Kireevsky. Verkið var fyrst flutt 1918 og þá með píanóundirleik. Gerðin sem við heyrum hér var frumflutt á tónleikum sem Arnold Schönberg stóð fyrir í Vín 6. júní 1919. Oftast eru vögguvísur kattarins sungnar á rússnesku en nú eru þær á þýsku.
Chalumeaux-tríóið var stofnað árið 1990 af klarínettuleikurunum Kjartani Óskarssyni, Óskari Ingólfssyni og Sigurði Ingva Snorrasyni. Á verkefnaskrá tríósins eru verk sem spanna alla sögu klarínettuhljóðfæranna eða frá um 1730. Tríóið leikur upphafleg verk eftir tónskáld eins og Mozart en jafnframt hafa þeir Kjartan og Sigurður umritað fjölda verka fyrir tríóið. Meðal þessara verka eru fjölmargar aríur úr óperum eftir Mozart og Salieri. Þessi verk hefur tríóið flutt ásamt þremur söngvurum. Þá hafa mörg íslensk tónskáld skrifað verk fyrir tríóið.
Ármann Helgason tók sæti Óskars Ingólfssonar sem lést 2009.
Hanna Dóra Sturludóttir, messósópran, stundaði söngnám hjá Kristni Sigmundssyni og Snæbjörgu Snæbjarnar við Söngskólann í Reykjavík en hélt svo til framhaldsnáms við Listaháskólann í Berlín. Meðal kennara hennar þar voru Dietrich Fischer-Dieskau og Aribert Reimann og við útskrift hlaut hún viðurkenningu fyrir framúrskarandi árangur. Hanna Dóra hefur sungið við mörg helstu óperuhús Þýskalands, m.a. Komische Oper og ríkisóperuna í Berlín. Á meðal þeirra u.þ.b. 40 hlutverka sem hún hefur túlkað á ferlinum eru Greifynjan í Brúðkaupi Figarós, Cio Cio San í Madame Butterfly, Marie í Wozzek, Miss Jessel í Tökin hert og titilhlutverkið í Ariadne á Naxos sem hún söng í Íslensku óperunni 2007. Haustið 2010 söng hún „Miss Donnithorne´s Maggot“ eftir Peter Maxwell Davies í ríkisóperunni í Berlín og hlaut mjög góða dóma. Hanna Dóra hefur sungið á tónleikum um allt Þýskaland og víða í Evrópu. Tónleikahaldið hefur m.a. borið hana til Katar og Egyptalands. Undanfarin ár hefur hún tekið þátt í fjölmörgum uppfærslum Novoflot í Berlín, óperusmiðju sem sérhæfir sig í frumflutningi á nýrri óperutónlist, og flutt með þeim verk m.a. í Varsjá og Lúxemborg. Sumarið 2012 var hún í aðalhlutverki í Wagnerin sem hópurinn setti upp í samstarfi við ríkisóperuna í München. Á Íslandi hefur hún tekið þátt í uppfærslum Íslensku óperunnar, haldið fjölda ljóðatónleika og sungið Vínartónleika með Sinfóníuhljómsveit Íslands og Salon Islandus. Hanna Dóra hefur þrisvar fengið tilnefningar til Íslensku tónlistarverðlaunanna; fyrir flutning sinn á Wesendonck-ljóðaflokknum eftir Richard Wagner með Sinfóníuhljómsveit Íslands vorið 2012, fyrir titilhlutverkið í Carmen hjá Íslensku óperunni haustið 2013 og nú síðast fyrir hlutverk Eboli í Don Carlo en fyrir það hlaut hún Íslensku tónlistarverðlaunin sem söngkona ársins 2014.