Gylfi Magnússon heldur erindið „Umsvif hins opinbera og atvinnuþátttaka kvenna“á málstofu hjá Viðskiptafræðideild.
Í öllum þróuðum ríkjum hafa umsvif hins opinbera aukist mun hraðar en stærð hagkerfisins a.m.k. síðan á 19. öld. Ísland sker sig ekki úr að þessu leyti, þannig var samneysla á Íslandi um 2,5% af vergri landsframleiðslu í upphafi 20. aldar en hlutfallið er nú um tífalt hærra. Þessi þróun, hlutfallslegur vöxtur opinbera geirans, hefur verið kölluð lögmál Wagners. Þrátt fyrir að þessi þjóðfélagsbreyting hafi ekki farið fram hjá neinum og mikið verið rannsökuð hafa ekki fundist á henni einhlítar skýringar þótt ýmsar tilgátur hafi verið settar fram.
Í málstofunni verður einkum fjallað um eina þeirra, þ.e. að þessa þróun megi að einhverju leyti skýra með breytingum á atvinnuþátttöku kvenna, sem hafa í mun ríkari mæli en áður farið að vinna utan heimila. Sú þjóðfélagsbreyting er einnig mjög sláandi. Sem dæmi má nefna að á fyrri hluta síðustu aldar vann um þriðjungur íslenskra kvenna utan heimilis en hlutfallið nú er um 78%. Þótt konur vinni í öllum geirum hagkerfisins þá eru þær hlutfallslega margar við störf í mennta- og heilbrigðisgeiranum, við félagslega þjónustu, menningu eða stjórnsýslu. Ríflega helmingur kvenna vinnur í þessum geirum, sem eru að mestu á vegum hins opinbera, á meðan einungis fimmti hver karlmaður gerir það.
Gylfi Magnússon er dósent við Viðskiptafræðideild Háskóla Íslands.