Laugardaginn 9. maí ver Nzar Rauf Abdullah doktorsritgerð sína í eðlisfræði við Raunvísindadeild Háskóla Íslands. Ritgerðin ber heitið: Holljóseindastýrð rafeindaleiðni um kerfi skammtapunkta og bylgjuleiðara (Cavity-photon controlled electron transport through quantum dots and waveguide systems).
Andmælendur eru dr. Michael Thorwart, prófessor við Háskólann í Hamborg, Þýskalandi, og dr. Einar Örn Sveinbjörnsson, prófessor við Raunvísindadeild Háskóla Íslands.
Leiðbeinandi var dr. Viðar Guðmundsson, prófessor við Raunvísindadeild Háskóla Íslands.
Auk hans sátu í doktorsnefnd dr. Andrei Manolescu, prófessor við Háskólann í Reykjavík, og dr. Chi-Shung Tang, prófessor við National United University í Miaoli á Tævan.
Dr. Hörður Filippusson, prófessor emerítus og staðgengill forseta Raunvísindadeildar, stjórnar athöfninni.
Ágrip af rannsókn
Í ritgerð Nzar Rauf Abdullah er lýst tímaháðum flutningi víxlverkandi rafeinda um tvívítt rafeindakerfi af takmarkaðri stærð. Um er að ræða staka skammtapunkta eða pör þeirra sem komið er fyrir í stuttum skammtavír. Einnig fjallar hann um kerfi skammtabylgjuleiðara. Rafeindakerfið er veiktengt ytri leiðslum, en sterklega tengt einum ljóseindahætti í rafsegulholi. Rannsóknirnar sýna að rafeindastraumur um kerfið er mjög háður upphaflegum fjölda ljóseinda í holinu og skautun þeirra.
Um doktorsefnið
Nzar Rauf Abdullah er fæddur 1983. Hann útskrifaðist með BS-gráðu í eðlisfræði frá Háskólanum í Sulaimani í Kúrdistan, Írak 2006, og lauk MS-gráðu í sömu grein frá Háskóla Íslands 2011.