Ásrún Matthíasdóttir ver doktorsritgerð sína í menntavísindum við Uppeldis- og menntunarfræðideild, Menntavísindasviði Háskóla Íslands „ EFTIR AÐ SKJÁRINN ER RÆSTUR NOTKUN UPPLÝSINGA OG SAMSKIPTATÆKNI Í FRAMHALDSSKÓLA Á ÍSLANDI“ Andmælendur eru dr. Kristiina Kumpulainen, prófessor við Háskólann í Helsinki, og dr. Gráinne Conole, prófessor við Háskólann í Leicester. Leiðbeinendur voru dr. Jón Torfi Jónasson, prófessor við Háskóla Íslands, og Sólveig Jakobsdóttir, dósent við Háskóla Íslands. Auk þess sat í doktorsnefnd dr. Inga Dóra Sigfúsdóttir, prófessor við Háskólann í Reykjavík. Dr. Ólafur Páll Jónsson, deildarforseti Uppeldis- og menntunarfræðideildar Menntavísindasviðs, stjórnar athöfninni.
Markmiðið með doktorsverkefninu After they turn on the screen. Use of information and communication technology in an upper secondary school in Iceland, er að öðlast skilning á áhrifum upplýsinga- og samskiptatækni (UST) á menntun í upphafi tuttugustu og fyrstu aldar. Sjónum er beint að því hvernig kennarar nota UST í kennslu sinni og hvernig nemendur læra í umhverfi sem styður notkun á UST. Í þeim tilgangi voru skoðuð áhrif UST á viðhorf og skoðanir kennara og nemenda rannsökuð, svo og kennsluaðferðir. Útgangspunktur rannsóknarinnar var notkun UST í styðjandi skólaumhverfi og dæmi um framsækna notkun UST í hefðbundnu umhverfi. Um er að ræða tilviksrannsókn (e. case study research), þar sem tilvikið er einn íslenskur framhaldsskóli, Menntaskólinn í Kópavogi (MK), sem hafði mótað sér metnaðarfulla stefnu í þessum málum. Rannsóknin sýndi afar fjölþætta notkun upplýsingatækninnar í kennslunni þótt hún væri almennt innan ramma hefðarinnar. Nemendur notuðu tölvurnar mikið og almennt eins og til stóð en notkunin var í sjálfu sér einföld. Höfundurinn dregur fram fjóra þætti, byggða á niðurstöðunum og fræðilegum bakgrunni verksins, sem kanna ætti frekar. Í fyrsta lagi ætti að draga betur fram og skoða menntunarþáttinn. Það felur í sér að gaumgæfa hin ýmsu rök fyrir notkun UST og æskilegar skoðanir, viðhorf, gildi og kennslufræðilega þekkingu, sem eru grundvallaratriði í árangursríkri beitingu UST í menntun. Í öðru lagi ætti að kanna notkunarþáttinn, en stöðug tækniþróun krefst hraðrar nýsköpunar og nýtingar nýrra möguleika. Í þriðja lagi er nauðsynlegt að rannsaka þjálfunarþáttinn og hvernig honum er sinnt, en UST-tæki bjóða stöðugt upp á nýja möguleika og tækifæri sem bæði kennarar og nemendur þurfa að vera þjálfaðir í að nýta í starfi sínu. Í fjórða lagi ætti að rannsaka þróunarþáttinn og hvernig honum er sinnt, en áhersla á UST í menntun er viðvarandi ferli sem mun ekki þrífast án stöðugrar nýbreytni og stuðnings við hana
Um doktorsefnið Ásrún Matthíasdóttir (f. 1956) er lektor við Tækni- og verkfræðideild Háskólans í Reykjavík. Sérsvið hennar er kennslufræði og gæði menntunar, en hún er með bakgrunn í tölvunarfræði og námsráðgjöf og MA-gráðu í Open and Distance Education frá Bretlandi. Ásrún hefur mikla reynslu af alþjóðlegum verkefnum, bæði norrænum og evrópskum, og hefur stýrt tveimur evrópskum verkefnum. Hún hefur langa reynslu af kennslu og rannsóknum, fyrst í framhaldsskólum og síðan í HR frá 2001. Ásrún hefur tekið þátt í að meta skólastarf og verði ráðgefandi fyrir skólastofnanir og kennara varðandi notkun upplýsingatækni í kennslu. Rannsóknir hennar hafa beinst að nýjum kennsluháttum, gæðum kennslu og velferð kennara og nemenda. Hún hefur hlotið fjölda styrkja fá Vísindasjóði og Nýsköpunarsjóði námsmanna og styrki til þróunarverkefna á sviði upplýsingatækni og stærðfræðikennslu í framhaldsskólum frá menntamálaráðuneytinu. Þá hefur hún leiðbeint fjölda BSc-nema og meistaranema við HR.