Nú er komið að þrettánda föstudagsseminar Sagnfræði- og heimspekideildar um söguleg efni sem haldið verður hinn 28. nóvember, í stofu 102 Gimli (G102), kl. 12-13. Framsögumaður í þetta skiptið verður Þóra Pétursdóttir, nýdoktor í fornleifafræði frá Universitetet i Tromsø og nefnir hún efni sitt: Hlutir, menning, minjar – Hugleiðingar um arfleifð.
Kjarni tölunar er eftirfarandi:
Í erindinu mun Þóra fjalla um nýlega afstaðna doktorsrannsókn, þar sem meðal annars var leitast við að líta hugtök eins og “menningarminjar” og “arfleifð” (heritage og cultural heritage) gagnrýnum augum. Rannsóknin snéri að aflögðum síldarbræðslum á Ströndum, en þrátt fyrir sögulegt mikilvægi njóta þær ekki lagalegrar verndar sem menningarminjar eða -verðmæti. Engu síður hafa bræðslurnar, líkt og margar “nútímarústir”, mikið aðdráttarafl, og áhugavert er að velta fyrir sér í hverju það felst, hvernig það falli að opinberum hugmyndum um menningarminjar, og/eða hvernig þær varpi gagnrýnu ljósi á þær hugmyndir.
Ennfremur mun Þóra ræða ný rannsóknaráform, tengd postdoc verkefninu “Wrack zone archaeology” við Háskólann í Tromsö. Hér verður kastljósinu beint að ríkulegu menningarlandslagi rekafjörunnar, og meðal annars reynt að máta það við hugmyndir um arfleifð og þær kröfur um t.d. “merkingu” og “samhengi” sem virðast liggja þeim til grundvallar.
--------------
Við hvetjum alla sem áhuga hafa til að koma og taka þátt í líflegum samræðum. Nýlega kom út bók hjá hinu þekkta alþjóðlega forlagi Routledge sem Þóra ritstýrir við annan mann (Björnar Olsen) sem nefnist Ruin Memories. Materialities, Aesthetics and the Archaeology of the Recent Past (2014). Hlökkum til að sjá ykkur sem flest.