Mánudaginn 29. september n.k. heldur Anna Carter Florence fyrirlestur í boði Guðfræðistofnunar í stofu 229 í Aðalbyggingu Háskóla Íslands. Fyrirlesturinn hefst kl. 11:40.
Yfirskrift fyrirlestursins er: What Matters for the Daughters of Zelophehad: Preaching and the Forty Year Mark.
Í tilefni af því að fjörutíu ár eru liðin frá vígslu kvenpresta á Íslandi er við hæfi að rifja upp sögu í Fjórðu Mósebók sem á sér stað fjörutíu árum eftir brottför Ísraels úr Egyptalandi. Sagan segir frá dætrum Selofhaðs sem höfðu djörfung til að inna Móse eftir hluta af arfi föður þeirra. Hvað getum við lært af þessum konum hvað varðar hlutverk predikunar í lífi ungra kvenna og karla í dag? Hvaða merkingu geta fjörutíu ára mörkin haft fyrir okkur?
Anna Carter Florence er dósent í predikunarfræðum við Columbia Theological Seminary í Decatur í Bandaríkjunum. Hún er vígður prestur í bandarísku Öldungakirkjunni (Presbyterian Church) og er með M.Div. gráðu frá Yale College og Ph.D. gráðu frá Princeton Theological Seminary. Hún hefur skrifað bækur eins og Preaching as Testimony og Inscribing the Word og hún sinnir kennslu ekki aðeins í Bandaríkjunum heldur víða annars staðar. Haustið 2012 flutti hún Lyman Beecher fyrirlestra um predikun við Yale Divinity School; næsta bók hennar er byggð á þessum fyrirlestrum.
Fyrirlesturinn er öllum opinn.