Háskóli Íslands og Happdrætti Háskóla Íslands taka þátt í HönnunarMars í ár og bjóða upp á sýningu á Háskólatorgi dagana 28.-30. mars á Háskólatorgi þar sem byggingarsaga ríflega 20 bygginga háskólans verður rifjuð upp.
Yfirskrift sýningarinnar er „Trúin á ævintýrin“ og vísar til frægrar hvatningarræðu sem Sigurður Nordal, þáverandi háskólarektor, flutti árið 1922. Á fyrstu árum háskólans var mikið rætt og ritað um húsnæðisvanda hans en árið 1922, þegar Háskóli Íslands hafði starfað í ellefu ár á neðstu hæð í Alþingishúsinu við Austurvöll, flutti Sigurður ræðu af svölum Alþingishússins þar sem hann hvatti Íslendinga til að leggja háskólanum lið enda þyrftu stúdentar viðunandi húsnæði. Sigurður líkti hugmyndum um uppbyggingu háskólans ýmist við „ævintýri“ eða „djarfan draum“.
Háskóli Íslands var til húsa í Alþingishúsinu þar til Aðalbygging háskólans var tilbúin árið 1940. Aðalbyggingin var reist fyrir fé frá Happdrætti Háskóla Íslands, líkt og yngri byggingar skólans, en happdrættið fagnar 80 ára afmæli í mars í ár. Af því tilefni verður rifjuð upp byggingasaga ríflega tuttugu bygginga háskólans á sérstakri sýningu á Háskólatorgi dagana 28.-30. mars. Uppbygging háskólabygginganna fléttast saman við sögu íslensks arkitektúrs og hönnunar á tímabilinu sem verða gerð skil á sýningunni í máli og myndum.
Sýningin á Háskólatorgi er hluti af HönnunarMars sem fer fram í sjötta sinn dagana 27. – 30. mars. Boðið er upp á ótal viðburði, innsetningar og sýningar. Á HönnunarMars er hönnun kynnt sem atvinnugrein sem byggir á traustum grunni og gegnir veigamiklu hlutverki í samtímanum.
Sjá upplýsingar um sýninguna á Háskólatorgi á heimasíðu HönnunarMars.
Sýningin er öllum opin.