Magnús Gottfreðsson prófessor í smitsjúkdómum og yfirlæknir á Landspítalanum mun veita innsýn í hina dularfullu og ógnvænlegu farsótt inflúensu í sögulegu samhengi. Fyrirlesturinn er ætlaður almenningi jafnt sem fræðimönnum.
Samkvæmt skráningu Landlæknisembættisins eru líkur á að inflúensufaraldurinn 2014 nái hámarki á næstu 2-3 vikum. Þó að í mörgum tilfellum valdi inflúensusmitið vægum einkennum er samt alltaf nokkur fjöldi einstaklinga sem verður alvarlega veikur. Í gegnum tíðina hefur okkur staðið ógn af þessum vágesti, enda spretta annað slagið upp mjög skæðir inflúensufaraldrar með tilheyrandi veikindum og dauðsföllum.
Fæstir gera sér grein fyrir því að í Spænsku veikinni, árið 1918, er áætlað að um 50 milljónir jarðarbúa hafi látist, miklu mun fleiri en létust í sjálfri fyrri heimstyrjöldinni. En hvað er inflúensa? Hvað er "svínaflensa" eða "fuglaflensa"? Hversu hrædd eigum við að vera gagnvart þessari farsótt og hvernig stendur á því að á hverju ári koma upp faraldrar? Af hverju eru þeir misalvarlegir? Hvaða hjálp er í lyfjameðferð eða bólusetningum við inflúensu?
Aðgangseyrir er 1.000 kr. og hægt er að kaupa miða á www.midi.is