Vísindakynning Landakotsskóla

Það verður líf og fjör í Tröð þegar nemendur Landakotsskóla kynna verkefni á sviði lífvísinda sem þeir hafa unnið að undanfarnar vikur. Nemendahópurinn spannar alla aldursflokka frá 5 til 15 ára, og verða tæplega 30 verkefni kynnt fyrir gestum og prófdómurum á vegum Stofnunar Sæmundar fróða. Landakotsskóli og Stofnun Sæmundar fróða við Háskóla Íslands hafa gert með sér samning um að hvetja ungt fólk til vísindaiðkunar en nemendur í Landakotsskóla vinna að verkefnum undir leiðsögn kennara sinna, ýmist ein eða í litlum hópum, og kynna verkefnin í Háskóla Íslands. Þetta samstarf hófst á síðasta ári og tókst þá svo vel að ákveðið var að halda því áfram.