Langtímarannsóknir á fjölmiðlanotkun ungs fólks – málþing til heiðurs Þorbirni Broddasyni
Dagana 17. og 18. janúar nk. munu fræðimenn frá 35 Evrópulöndum auk gesta frá Ástralíu, Brasilíu og Rússlandi, funda Í Reykjavík til að ræða þróun og stöðu rannsókna á fjölmiðlanotkun ungs fólks. Í þessum hópi eru margir af fremstu fræðimönnum í Evrópu á þessu sviði. Ástæða þess að fundað er á Íslandi er ekki síst sú að þar er að finna þessa elstu langtímarannsókn á fjölmiðlanotkun ungs fólks.
Af þessu tilefni efna Félags- og mannvísindadeild HÍ, Félagsvísindadeild HA og samstarfsnet Evrópskra fræðimanna um rannsóknir á internetnotkun barna til málþings til Heiðurs Þorbirni Broddasyni þar sem fjallað verður um rannsóknir hans og það sem efst er á baugi í rannsóknum á fjölmiðlanotkun ungs fólks.
Málþingið fer fram í húsakynnum HÍ, Öskju (stofu 132) föstudaginn 17. janúar frá kl. 14 – 16 og er öllum opið meðan húsrúm leyfir.
Undanfarin ár hefur áhugi á samanburðarrannsóknum vaxið mjög meðal fræðimanna sem rannsaka fjölmiðlanotkun ungs fólks. Þar skiptir máli annars vegar að slíkar rannsóknir eru auðveldari í framkvæmd en áður en ekki síður að skilningur á mikilvægi slíkra rannsókna hefur aukist mjög. Rannsóknir sem fela í sér samanburð milli landa eru þó fátíðar þrátt fyrir markvissa viðleitni margra aðila til að fjölga verkefnum af því tagi. Af ríflega eittþúsund rannsóknum á internetnotkun barna sem gerðar hafa verið frá árinu 2000 eru innan við 5% sem fela í sér gagnaöflun í meira en einu landi. Í þeim tilvikum sem rannsóknir ná til fleiri landa er ennfremur oftast aðeins um að ræða 2-3 lönd. Rannsóknir sem fela í sér markvissan samanburð milli ára eru enn fátíðari. Í ljósi þessa er Íslenska rannsóknarverkefnið Börn og sjónvarp algerlega einstakt á heimsvísu. Upphaf rannsóknarinnar má rekja aftur til ársins 1968 þegar spurningalisti var lagður fyrir 601 nemanda í nokkrum grunnskólum á Íslandi. Tilgangurinn var ekki síst að nýta hinar einstöku aðstæður sem til staðar voru árið 1968 þar sem útsendingar sjónvarps höfðu staðið í tæp tvö ár en náðu þó ekki til landsins alls. Engin ákveðin áform voru uppi um það þá að nota rannsóknina sem grundvöll áframhaldandi gagnasöfnunar í framtíðinni en fljótlega varð þó ljóst að gögnin frá 1968 veittu einstæðar upplýsingar um viðfangsefni sem sífellt meiri áhugi var á að rannsaka. Því var ráðist í aðra könnun árið 1979 og nú er svo komið að verkefni sem byrjaði sem gagnaöflun fyrir meistaraprófsverkefni er orðið að langtímarannsókn sem spannar ríflega 40 ár og sjö rannsóknarlotur (1968, 1979, 1985, 1991, 1997, 2003 og 2009). Upphafsmaður verkefnisins og sá sem borði hefur hitann og þungann af því öll þessi ár er Þorbjörn Broddason prófessor í félagsfræði við HÍ.
Þau sem koma fram á málþinginu eru:
Þorbjörn Broddason, prófessor við félags- og mannvísindadeild HÍ
Uwe Hasebrink, prófessor við háskólann í Hamborg og forstöðumaður Hans-Bredow rannsóknarmiðstöðvarinnar í fjölmiðlafræði
Sonia Livingstone, prófessor við fjölmiðlafræðideild London School of Economics and Political Science, London
David Smahel, dósent við sálfræðideild Mazaryk University, Brno
Giovanna Masceroni, lektor við félagsvísindadeild Università Cattolica del Sacro Cuore, Mílanó
Lelia Green, prófessor við fjölmiðlafræðideild Edith Cowan University, Perth
Kjartan Ólafsson, lektor við félagsvísindadeild Háskólans á Akureyri stýrir málþinginu og Ellen Helsper, lektor við við fjölmiðlafræðideild London School of Economics and Political Science stýrir umræðum í lok málþingsins.
Dagskráin fer fram á ensku.
Eftir málþingið býður Félags- og mannvísindadeild málþingsgestum að þiggja léttar veitingar.