Hvenær hefst þessi viðburður:
11. nóvember 2016 - 9:00 til 17:00
Nánari staðsetning:
Safnahúsinu - Hverfisgötu
Ísland er þátttakandi í evrópsku samstarfi um málföng - European Language Resource Coordination, ELRC. Málföng er nýyrði fyrir 'language resources', þ.e. hvers kyns málgögn og hugbúnað tengd tungumálum.
Föstudaginn 11. nóvember nk. verður haldin vinnustofa til að kynna verkefnið á Íslandi. Vinnustofan fer fram í Safnahúsinu við Hverfisgötu kl. 9-17. Ætlunin er að vekja athygli á verkefninu meðal aðila sem sinna þjónustu við almenning og fyrirtæki en ljóst er að verkefnið er til þess fallið að auka og bæta aðgengi almennings og fyrirtækja að stjórnsýslu og auðvelda samskipti við stjórnvöld. Þetta er mikilvægt í samfélagi þar sem er vaxandi þörf fyrir að geta sinnt öðrum en þeim sem eiga íslensku að móðurmáli.
Um er að ræða samstarfshóp sem settur var á fót vorið 2015 innan Connecting Europe Facility-áætlunar Evrópusambandsins. Meginmarkmið samstarfshópsins er að safna og koma upp hvers kyns málgögnum sem geti nýst við þróun vélrænna þýðinga í þeim tilgangi að auðvelda aðgengi að hvers kyns þjónustu milli tungumála og málsvæða. Verkefnið nær til alls Evrópska efnahagssvæðisins, þ.e. opinberra tungumála Evrópusambandsríkjanna, auk norsku og íslensku.
Aðgangur er ókeypis en áhugasamir þátttakendur eru vinsamlegast beðnir um að skrá sig á vefsíðu vinnustofunnar.
