Össur Ingi Emilsson ver doktorsritgerð sína í læknavísindum, sem ber heitið: Tengsl vélindabakflæðis að nóttu við öndunarfæraeinkenni og kæfisvefn - Nocturnal Gastroesophageal Reflux - Respiratory Symptoms and Obstructive Sleep Apnea.
Andmælendur eru dr. Ludger Grote, dósent í lungnarannsóknum við Sahlgrenska sjúkrahúsið í Gautaborg, og dr. Guðjón Kristjánsson, forstöðulæknir lyflækningadeildar á Sjúkrahúsinu á Akureyri.
Umsjónarkennari var dr. Þórarinn Gíslason, prófessor við Læknadeild Háskóla Íslands, og leiðbeinandi var dr. Christer Janson, prófessor við Háskólann í Uppsölum. Auk þeirra sátu í doktorsnefnd dr. Einar Stefán Björnsson, prófessor við Læknadeild Háskóla Íslands, dr. Bryndís Benediktsdóttir, prófessor við sömu deild, og dr. Sigurður Júlíusson, sérfræðingur í háls-, nef- og eyrnalækningum.
Dr. Helga Ögmundsdóttir, prófessor við Læknadeild Háskóla Íslands, stjórnar athöfninni.
Ágrip af rannsókn
Vélindabakflæði að nóttu (VBn) tengist bæði öndunarfæraeinkennum og einnig einkennum svefnháðra öndunartruflana (SHÖ), en ekki er vitað hvort um orsakatengsl sé að ræða. Markmið verkefnisins var að skoða tengsl VBn við öndunarfæraeinkenni og einkenni SHÖ, sem og breytingar á blástursprófi, svefnrannsókn og lífmerki frá öndunarfærunum.
Þátttakendur í tveimur stórum alþjóðarannsóknum sem byggja á slembiþýði voru rannsakaðir. Að auki var hluta þátttakenda á Íslandi boðið í umfangsmiklar viðbótarrannsóknir á VBn og öndunarfærum. Í öllum rannsóknum voru þátttakendur taldir hafa VBn ef þeir greindu frá einkennum brjóstsviða eða nábíts að nóttu. Öndunarfæraeinkenni og einkenni SHÖ voru metin með spurningalistum, blóðsýnum safnað og blásturspróf framkvæmd. Valið íslenskt undirþýði gekkst að auki undir svefnrannsókn og gaf tvenns lags sýni af útöndunarlofti: Vökvaþéttisýni og smáagnasýni. Hluti þessa þýðis gekkst einnig undir 24 tíma samviðnáms- og pH vélindamælingu.
Niðurstöðurnar sýndu að vélindabakflæði að nóttu tengdist einkennum astma, berkjubólgu og öndunarerfiðleika í svefni. Tímabundnar versnanir öndunarfæraeinkenna voru algengari meðal þátttakenda með VBn. Viðvarandi VBn var áhættuþáttur fyrir að öndunarfæraeinkenni og einkenni öndunarerfiðleika í svefni kæmu fram á níu ára tímabili. VBn tengdist einnig marktækt hrotum samkvæmt svefnmælingu, sem benti til aukins öndunarerfiðis í svefni hjá þessum þátttakendum. Lífefnamælingar á vökvaþéttisýnum og smáagnasýnum útöndunarlofts gáfu vísbendingar um að bólga í loftvegum sé ein skýring þessara tengsla. Þessar niðurstöður voru óháðar líkamsþyngdarstuðli.
Um doktorsefnið
Össur Ingi Emilsson er fæddur árið 1985 og lauk stúdentsprófi frá Menntaskólanum í Reykjavík árið 2005. Hann lauk cand.med. námi frá Háskóla Íslands árið 2011 og fékk lækningaleyfi árið 2012. Össur innritaðist í doktorsnám við Háskóla Íslands árið 2012. Hann hefur starfað sem almennur læknir á Landspítala á árunum 2012 til 2014. Þá fluttist hann til Svíþjóðar til sérnáms í lyf- og lungnalækningum þar sem hann starfar í dag. Össur er giftur Eyrúnu Hörpu Gísladóttur og eiga þau tvo drengi, Emil Kára þriggja ára og Viktor Ara eins árs.