Fyrirlesari: Jónatan Hermannsson, lektor við Auðlindadeild Landbúnaðarháskóla Íslands.
Einhvers konar garðrækt hefur verið stunduð hér á landi allt frá upphafi Íslandsbyggðar. Næpur og gulrófur hafa gegnt þar lykilhlutverki. Gulrófan þó ekki nema síðari hluta tímabilsins því svo virðist sem hún hafi ekki orðið til fyrr en á sextándu öld. Blómaskeið íslenskrar garðræktar var á nítjándu öld og fram eftir þeirri tuttugustu. Gulrófan var þar í heiðurssæti lengi vel en hefur fyrir löngu vikið úr því sæti fyrir kartöflunni. Garðyrkja þótti verðugt viðfangsefni heldra fóks á þeim tímum og fyrirmannlegustu embættismenn þjóðarinnar stofnuðu Garðyrkjufélag Íslands. Í erindinu verður horft á garðrækt í sögulegu ljósi og raktir ýmsir þræðir í ættarsögu gulrófunnar og fjallað um vandamál við að halda árunni hreinni á svo lauslátri plöntu.