Christophe Loir heldur fyrirlestur í boði Sagnfræðistofnunar Háskóla Íslands fimmtudaginn 26. september, kl. 16:30, í stofu 423 í Árnagarði.
Gríðarleg gróska hefur verið í rannsóknum á sögu borga á undanförnum árum, og er þar beitt margvíslegum aðferðum og ýmsar tegundir heimilda hafa verið notaðar til að varpa ljósi á þróun borgarskipulags og borgarmenningar. Í fyrirlestrinum mun Christophe Loir gera grein fyrir helstu straumum í ritun borgarsögu á síðustu árum. Síðan mun hann nota tvö dæmi til að leggja áherslu á mikilvægi þverfaglegra rannsókna í rannsóknum á borgarsögu, og snýr annað að mikilvægi bókmennta í að kortleggja borgarlandslag og hitt að því hvernig rannsóknir á vissum þáttum í skipulagi borga, s.s. þróun gangstétta, varpa ljósi á þróun borga. Fyrirlesturinn er fluttur á ensku og er öllum opinn.
Christophe Loir er prófessor í sagnfræði við Université Libre í Brussel. Hann hefur einkum lagt stund á lista- og borgarsögu 18. og 19. aldar, með sérstakri áherslu á þróun borgarlandslags og menningarlegs rýmis í borgum.