Laugardaginn 28. mars ver Seyedmohammad Shayestehaminzadeh doktorsritgerð sína í eðlisfræði við Raunvísindadeild Háskóla Íslands. Ritgerðin ber heitið: Ræktun þunnra húða, eiginleikar og hagnýting þeirra (e. Growth of Functional Thin Films by HiPIMS: Fundamentals, Challenges, and Applications).
Andmælendur eru dr. Andre Anders, vísindamaður við Lawrence Berkeley National Laboratory, Bandaríkjunum og ritstjóri Journal of Applied Physics, og dr. Jochen M. Schneider, prófessor í efnisvísindum við Aachen University, Þýskalandi.
Leiðbeinandi var dr. Sveinn Ólafsson, vísindamaður við Raunvísindastofnun Háskólans. Auk hans sátu í doktorsnefnd dr. Hafliði Pétur Gíslason, prófessor við Raunvísindadeild Háskóla Íslands, og dr. Kristján Leósson, framkvæmdastjóri við Nýsköpunarmiðstöð Íslands.
Dr. Oddur Ingólfsson, prófessor og varadeildarforseti Raunvísindadeildar, stjórnar athöfninni.
Ágrip af rannsókn
Ræktun á þunnum efnahúðum er tæknileg undirstaða allrar hátækni á sviði rafeindatækni, tölvutækni, fjarskipta og snjallsímatækni. Efnin eru ræktuð með ýmsum aðferðum eins og hvarfræktun, gufuræktun og segulspætun. Segulspætun er vinsæl ræktunaraðferð sem getur ræktað m.a. húðir á mjög stóra fleti. Algengustu afbrigði hennar eru jafnstraums-segulspætun, hátíðni-segulspætun og loks hin nýlega háafls-segulspætun.
Doktorsverkefnið miðar að því að skoða mun á ræktun vissra húða með jafnstraums- og háaflsaðferðunum. Þetta var gert fyrir efni eins og Mo/V ofurgrindur, TiN, TiO2, SiO2 og vanadínoxíð. Nýr mælibúnaður var þróaður auk þess sem fyrstu stig ræktunar á húðum voru rannsökuð með leiðnimælingum.
Um doktorsefnið
Seyedmohammad Shayestehaminzadeh lauk B.Sc. gráðu í rafmagnsverkfræði frá Iran University of Science and Technology í Teheran, Íran, árið 2008, og lauk M.Sc. gráðu í örtækni frá Konunglega Tækniháskólanum í Stokkhólmi, Svíþjóð árið 2010. Hann hóf doktorsnám sitt við Raunvísindadeild Háskóla Íslands í desember 2011.