Námsbraut í heimspeki við Háskóla Íslands heldur áfram að kynna kvenheimspekinga í haust undir yfirskriftinni: Kvenheimspekingar koma í kaffi. Efnt verður til erinda annan hvern fimmtudag kl. 15-16 í Lögbergi. (Sjá haustdagskrá -pdf).
Eiríkur Smári Sigurðsson heldur fyrsta erindið á þessu hausti og fjallar um Gyðju Parmenídesar.
Parmenídes, mesti skynsemishyggjumaður forvera heimspekinnar, setur kenningar sínar í munn gyðju sem hann hittir í handanheimum. Hún tekur á móti honum, ungum manninum, og leiðir í allan sannleikann um heiminn. Í kaffi dagsins verður þessi saga skýrð og nokkrar túlkanir á henni ræddar og hún m.a. skoðuð í ljósi annarra frásagna af gyðjum og ungum mönnum sem hitta þær til að læra sannleikann (t.d. Hesíódos og Sókrates). Gyðja Parmenídesar er vissulega ekki heimspekingur í sama skilningi og (flestar) aðrar sem er fjallað um í kvenheimspekikaffinu en hún getur þó varpað ljósi á stöðu kvenna og hins kvenlega í upphafi heimspekisögu Vesturlanda.