Kristinsdóttir
Fimmtudaginn 27. nóv. er boðið til kynningar á bókinni Ofbeldi á heimili Með augum barna. Sex konur stóð að gerð bókarinnar, allt kennarar og fyrrverandi nemar við Menntavísindasvið Háskóla Íslands. Bókin er framlag til rannsókna á heimilisofbeldi, vanrækslu og misbeitingu gagnvart börnum og mæðrum og er jafnframt innlegg í baráttuna gegn þessu alvarlega þjóðfélagsmeini.
Meðal spurninga sem fengist er við í bókinni eru: Hvaða vitneskju hafa börn um heimilisofbeldi? Hvernig bregðast þau við því? Hvaða áhrif hefur ofbeldið? Hvernig finnst börnum samfélagið bregðast við? Hvað segja prentmiðlar um heimilisofbeldi?
Í rannsókninni var leitað til barnanna sjálfra til að athuga hvaða hugmyndir þau hefðu um heimilisofbeldi. Þar kom meðal annars fram að börn gera sér betur grein fyrir því ofbeldi sem beitt er á heimili en oft er talið og hversu óásættanlegt það er. Í bókinni segja börn frá skilningi sínum og viðbrögðum. Einnig lýsa mæður, sem bjuggu við ofbeldi, reynslu sinni. Rýnt er í orðræðu prentmiðla um heimilisofbeldi og rætt um aðkomu fagfólks og forvarnarhlutverk grunnskólans.
Kynningin hefst kl. 15:00 og fer fram í stofu H – 001 í Hamri, byggingu Menntavísindasviðs Háskóla Íslands. Gengið er inn frá Háteigsvegi og inn í bókasafn sviðsins. Bókin verður boðin á kynningarverði.
Ritstjóri bókarinnar er Guðrún Kristinsdóttir, prófessor við Menntavísindasvið HÍ.
Athuganir að baki bókarinnar voru gerðar með styrk úr rannsóknarsjóðum. Ragnar Helgi Ólafsson hannaði bókarkápu. Háskólaútgáfan gefur út.