Í skugga velsældar á óvissutímum. Rannsókn á flæði fólks úr skóla yfir á vinnumarkað. Málstofa RBF og Félagsráðgjafardeildar

Málstofuröð Rannsóknarstofnunar í barna- og fjölskylduvernd og Félagsráðgjafardeildar.

Jóhanna RósaArnardóttir mun fjalla um doktorsritgerð sína um flæði fólks úr skóla yfir á vinnumarkað sem ber heitið Transition from school to work. Job opportunities by different educational pathways and inacitivity in the labour market among 16-34-year-olds in Iceland.
Markmiðið er að auka skilning á stöðu ungs fólks á aldrinum 16 til 34 ára á leið þeirra frá skóla til vinnu. Rannsókninni er beint að atvinnutækifærum ungmenna greint eftir fjórum megin menntaleiðum og óvirkni á vinnumarkaði. Niðurstöður byggja á eigin úrvinnslu úr vinnumarkaðskönnun Hagstofu Íslands frá árunum 2006–2008 og á öðrum ársfjórðungi 2009 en þá var bætt við könnun um inngöngu ungmenna inná vinnumarkað. Staðan á Íslandi er einnig borin saman við Norðurlöndin, Þýskaland, Spán, Bretland og Bandaríkin.

Niðurstöður sýna að þau ungmenni sem ljúka háskólaprófi eru líklegri en hin til að fá hærra sett störf að loknu námi og þau sem ekki hafa lokið framhaldsskólaprófi að fá lægra sett störf þegar tekið hefur verið tillit til kyns, aldurs, búsetu, uppruna og menntunar foreldra.  Niðurstöður benda til að ójöfnuð sé hugsanlega að finna í menntakerfinu þar sem þau ungmenni sem ljúka háskólaprófi eru líklegri til að eiga foreldri sem einnig hefur lokið háskólaprófi og þau ungmenni sem hafa ekki lokið framhaldsskóla eiga oftar foreldra sem hafa litla menntun. Þeim ungmennum sem ljúka starfsnámi gengur betur í upphafi að fá fullt starf með fastráðningu en hvort um jákvæð langtímaáhrif er að ræða er ekki jafn ljóst. Þau sem ljúka bóknámi hafa aðgang að háskólanámi, þau fá hærra sett störf og efnahagshrunið hafði ekki jafn slæm áhrif á stöðu þeirra á vinnumarkaði og hjá þeim sem höfðu lokið starfsnámi. Þau ungmenni sem eru hvorki í skóla né vinnu eru líklegri en hin til að hafa ekki lokið framhaldsskólaprófi og til að fá lakari störf í upphafi starfsferilsins þegar tekið hefur verið tillit til mismunandi áhrifa kyns, aldurs, búsetu, uppruna, heilsu og menntunar foreldra.